#613
Unread post
by seriousnessisamess » Sun Jan 26, 2014 1:14 am
Sharmnaak haalaat
Aaj bohra community us tiraahe per khadi hai jiska ek raasta seyedna muffadhal ki taraf ,ek raasta seyedna khuzaima ki taraf aur teesra raasta sirat e mustaqeem ka hai . ab ya to qoum aankho per patti baandh kar pehla ya doosra raasta ikhtiyaar kare ya allah ki ashraf al makhlooq hone ka haq ada karte hue apni jismani , ruhaani aankhe khol kar teesra raasta ikhtiyaar kare.
Apne da’ai al mutlaq ki jaanasheeni ki kheench taan ne aaj jo haalat bohra community ki kar di hai wo behad sharmnaak hai , da’ai al mutlaq jaise auhade ki mazaaq , beizzati, jaisi hamaari generation ne dekhi waisi guzre waqt mai kisi ne nahi dekhi apne aap ko da’ai al mutlaq jaise moazzam auhade ke nayab bataane wale is chacha-bhatija ki jung ne bohra community ke ser ko sharm se jhuka diya, doosri communities ko aaj bohra jaisi community per hansi bhi aa rahi hai aur taras bhi k “ bohra’s ki jannat ke zaamin hone ka daawa karne wala khaandaan aaj apne hi ghar walo per laanat bol bhi raha hai aur bulwa bhi raha hai , ek doosre ko yazeed , shimar aur na jaane kya kya bad se badtar khitaabo se nawaaz raha hai jiski ummeed kisi paagal, sharaabi , gunde, mawaaliyo se hi ki ja sakti hai , kam se kam kisi da’ai , maazoon ya mukaasir ke auhde par fayiz insaan se to nahi ki ja sakti.
Lekin alhamdolillah jo hota hai achche k liye hota, hai aaj is jung se yeh baat saaf ho gayi hai ki is tarah ki sharmnaak harkat karne wale log duniyawi politics ke leader to ho sakte hai lekin kisi qoum ke mazhabi ya deeni rehnuma nahi ho sakte……..aaj har us musalmaan ko sharm aayegi ki is tarah ke log kisi aisi qoum ki rehnumaai kar rahe hai jo apne ko deen e islaam ka firqa manta hai……. Kyunki deen e islam ki rehnumaai ke liye allah (swt) ne mohammad rasoolallah (saw), moula e qaayenat ali ibne abitalib (as), imam hasan (as), imam hussain (as) , tamaam aayemat tahireen (as) aur unke muntakhab kiye hue muqqaddas , aala o azeem bando ko bheja hai jinki hayaat at’tayyibah kisi se chchupi nahi hai , ek taraf jis saadgi se in aala hastiyon ni apni zindagi basar ki uski misaal nahi mil sakti , moula ali (as) ne jahan poori hayat ad’duniya sirf jou ki sookhi roti kha kar guzaari , imam zainul aabedeen (as) apne baazu mubaarak per gareebon
ke liye khaane ka boj utha kar raat ki taariqiyon mai khaana taqseem karne ghar- ghar jaate the jis ki wajah se aap ke baazu zakhmi rehte the…..aur tamaam aisi saadgi ki haqeeqato se taareekh bhari hui hai jisko likhna mumkin nahi ……doosri taraf apne aap ko unhi aala hastiyon ke waris bataane wale aaj ke yeh da’ai jab zyaafat per jaate hai to unke dastarkhwaan per senkdo lazzatdar pakwaan aur aisi nazaaqat o hasham ki numaaish hoti hai jaise kisi baadshah ya underworld don ki daawat hoti hai..
Aaj ka koi nasamajh ya anpadh aadmi bhi aaj k seyedna ki aisi lavish life style dekh kar itna to andaaza laga sakta hai ki aaj ke yeh da’ai kam se kam un aala o muqqadas hastiyon ke waris to nahi ho sakte . aaj ke da’ai jo unke nakhsh e qadam per chalna to door unke bilkul ulat qoum k paiso per duniya ki lazzat o aish o aaram se bhari hui zindagi basar kar rahe hai , ek aam aadmi bhi un paak aura ala hastiyon ke bataaye raaste per chalne ki koshish to karta hai lekin khud ko unke waris bataane wale is khaandan ke liye to sab jaayez hai.
Deen e islam mai ilm haasil karne per kitna zor diya hai yeh isi baat se zahir ho jata hai ke allah (swt) ne quraan ke nuzool ki ibteda hi “IQRA” (padho) se ki lekin aaj ke da’ai qoum ko ilm lene ki raza nahi de sakte hai , inko maalum hai ki ek baar qoum ke paas ilm aa gaya to koi inke peecche nahi chalega aur ye log khaas se aam ban jaayenge .
Aaj ke yeh rehnumaa khud bhi gumrah hai aur guzishta kuch saalo se poori qoum ko gumrah karne ke ghinoney kaam ko anjaam de rahe hai sirf aur sirf duniyawi aish o aaraam aur lazzat ki khaatir jo haqiqi deeni aur mazhabi rehnuma ka maqsad nahi ho sakta, Quraan ka tarjuma na padho , doosri qoum ki majlis mai na jaao , waaz mai na jaao , hamaare likhe ya filter kiye hue nohe ya kitaab ke alaawa koi aur kitab ya nohe na padho ……..bas wohi pado ,wohi suno, wohi karo , wohi bolo jisme hamaari taareef ho bas iske alaawa sab fareb ???? Aaj ke da’ai ke is tarah ke khudgarzi bhare ajeeb o gareeb farmaan ki wajah se qoum aaj haqiqi shariyat aur siraat e mustaqeem ke ilm ko hasil karne se mehroom reh gayi hai….qoum deen e haq ka ilm haasil kare to kaise kare jab baahar se ilm lena haraam kar diya jaaye aur qoum ke andar aapke paas koi haqiqi aalim nahi….. iska matlab ab koi ilm nahi milega…..milega to sirf raza ya khaane ka tiffin uske liye bhi paise
to chukaane hai.
deen e haq ki buniyaad ilm per hai , allah (swt) ne qayenaat ka kaamil ilm apne rasool (saw) k zariye hum ko quraan mai ataa kar diya hai mahaz isliye nahi ki sirf iski tilaawat ki jaaye balki insaan quran ki tilaawat kare , aalimo se dars hasil kare aur khud apni aql se soche samjhe aur us per amal kare . insaan ko aalim banega to wo khud apne ilm ki buniyaad per yeh faisla karega ki kya sahi hai aur kya ghalat , lekin aaj qoum ko misaaq aur baraat ke naam se daraa kar uski soch par bhi paabandi laga di gayi hai , momin ko la-ilmi mai daal kar itna bebas aur majboor kar diya hai ab kya sahi hai aur kya ghalat yeh faisla karne ka haq bhi us se chheen liya gaya hai.
Allah (swt) ne har insaan ko sochne ke liye aql ataa ki hai isliye nahi ke wo kisi ke peechhe aankh band kar ke chalta rahe balki isliye ke uska istemaal kar wo khud sahi aur ghalat ka faisla kar apne aamaal ko anjaam de aur us khaaliq e kul ko raazi kare na ki kisi khudgarz makhlooq ko……
Kyu aaj ek momin , insaan hote hue bhi bina daaye ya baaye dekhe tamtam mai bandhe ghode ki tarah chalne ke liye majboor hai ? ab waqt aa gaya hai kisi aur ko apni soch ka maalik na banao… socho, samjho , apni aql ka aazadi se istemaal karo aur sahi raasta apne liye chun lo ………ek taraf khudgarz makhlooq hai aur doosri taraf khaaliq e kayenaat hai ….aap kisko raazi karna chahte hai ? kiske bande ban na chahte hai ? ………………………………….yeh khud ko sochna hai.